2016年8月12日 星期五

回憶第一次認識股票


最近股市勢頭不錯,美股創新高,炒作板塊一個接一個,由REITS到濠賭、基建等等。最近又傳深港通,終於炒下388, 806,同埋券商股。講起806,叫有少少開心啦L因為公佈脫歐大趺千點當天,我唯一有趁低吸納的是806,點知恆指呢個小升浪中,佢同388一樣,都係無咩點升過==不過算啦,買得佢都預左守下,等待牛3既時間來臨,呢類同大牛市相關既股票,就是收穫之時。

股票呢項投資工具,好坦白講,自己就絕對唔叻,技術分析等等呢D不太曉,同埋股市我覺得人為操控成份都重,所以都不太會將太多資金投放響呢項投資工具,都係大趺市小注分段入D唔需要太用腦既股票,例如2800這類。最近期既操作,係將今年2月左右,響18.9買入的2800,響23蚊沽出。因為呢一浪都差不多升3000點,恆指有機會調整,而且呢個價位水平,息率得返4%以下,都係先行沽出觀望下先。

其實自我認識股票呢個投資工具,要追溯返就係06, 07年左右既大牛市開始,結果係點,哈哈,第一次買股票仔,入世未深,又遇著大牛市,當然係交學費啦! 不過都係有限錢既,果時都係仲讀緊書,都係得零用錢,同幫人part time補下習,本錢不多。輸左,大不了再黎過,反正仲年輕。所以投資既野,的確愈早愈好,即使最壞既結果是一鋪清袋,大不了再努力,亦及早了解風險,之後仍有光陰去收復失地。

2016年8月5日 星期五

友誼這回事


很多時FACEBOOK都會彈出一些當年今日的相片,勾起不少回憶。很多時候,我看到這些相片,主要的感受都是: 「嘩,時間過得好快,咁又X年」、「我以前個樣青春好多@@

最近FACEBOOK有兩張當年今日的相,看過後令我有另一種感慨。第一張,我是跟一位好朋友影,其實我跟她以前是很好朋友,但有時候,其實感到自己常常被她利用,簡單D而言,算是「有事鍾無艷,無事夏迎春」又或者「搵你笨」; 自己暗地裡,其實當然不太喜歡,但我份人又傾向比較和平,所以只是心底裡明白就算,不會喜惡形於色,同時不會主動約她就當平衡返自己心理@@

另一張是跟一班中學最要好的朋友於西九龍中心明將挑戰食紅豆壽司時影的。沒錯,是紅豆壽司! 當年是很HIT的,年少輕狂的我們,當然想去挑戰下,係咪真的咁難食,哈哈! 話時話,我覺得明將真的是十分成功。正常黎講,難食的東西,我們會避開唔去幫襯,但明將竟然令人反而躍躍欲試,想挑戰一番,更引來不少人聯群結友,拉大隊去食,將過程拍片上載至YOUTUBE,引起迥響,在我心目中,絕對是成功出位呀!

好,講返正題,點解呢張相令我感概。因為相中有一位朋友於一兩年前突然QUIT我們的WHATAPPS GROUP,之後便一直疏遠了我們。但想講我們成班朋友一直都相處得很開心,我們一大班朋友,有誰生日,會一起出來慶祝; 一起去唱K, 踩單車,甚至一起去食明將,這些片段都很深刻。所以我完全不明白為什麼他那麼恨心斷絕了我們由中學開始的友誼。我打聽朋友口風,想知道他為什麼遠離了我們。最後只是知道他識了女朋友,就沒有其他特別了。有時候,我都很無奈,覺得應該有一些原因導致他這樣決定,但當然他不會那麼輕易透露真正原因。
友誼這回事,可以很簡單、單純,但也可以變得複雜呀。

2016年7月25日 星期一

先苦後甜


昨天看FACEBOOK,除了被POKEMON洗版外,看到有一個POST也令我頗深刻,就是說一對80後情侶)(或夫婦)於過去數年日子,每月儲萬多元,放假不會四處去玩樂消費,昨天成功購入居屋上車。

接著看一下留言,果然又是批評和取笑他們的說話。例如 : 「嘩 ! 為層樓搞到個人都殘晒, 28?唔係掛?睇個樣仲老過我老豆WOR…」、「以做樓奴為目標,好可悲,分分鐘死左個刻都未供完層樓呀」。

其實每個人都有自己夢想和目標,你可以唔認同,但又何必人身攻擊。說真的,我是十分欣賞人家為了夢想,願意先苦後甜,減省享樂,靠自己努力儲首期去買樓。隨著時代進步,外界物質誘惑愈來愈多,要控制好自己的購買慾,說就容易,執行卻是需要自己有很強的自律性,

先苦後甜,是家人經常提點我的說話。這個世界,資源有限,慾望無限,為了達到自己理想,有時得先苦後甜,下一番苦功,忍耐一下。以前小時候,為了默書一百分有老師的小文具獎勵,會努力溫習 ; 到現在,為了有多餘金錢進修,增值自己去學化妝SET頭,其實這幾年來都沒怎去旅行(除了結婚HONEYMOON去了新加坡, 哈哈)。我深信,享樂是片刻的,但學會的技術是終生受用,是值得的。

在物質豐富的世界,卻是誰又想到先苦後甜的道理?

2016年7月21日 星期四

置業準備---地點篇


下年度和先生打算置業搬出來,所以最近都會做下功課,了解行情。除了上網研究下心儀地區的成交、平面圖等資料,也有實地落區行下,視察下。

以前我是住新界最北端,交通十分不便,出市區最少都一小時,而屋苑出鐵路站,步行最少也15分鐘。老實說,行到出去也滿頭大汗。所以那時真的變了宅女般,放假都不想去街,乾脆留在家算。

到上年結婚,跟先生的家人住在港島區,真的覺得去了天堂般,深深感受到居住市區之便。上班可以訓多一會,對於我這條懶訓蟲,已是最大的優點。所以我終於明白到一些資深物業投資者,為什麼那麼著重LOCATION!
如果沒什麼特別,我想港島區都是我和先生的首選。港島區有另一個吸引我的地方,就是這地區擁有全香港最獨一無二的交通工具---電車。除了價錢便宜,有時候晚上坐在上層,靜靜地看都市夜景、人生百態,也是很RELAX!

2016年7月20日 星期三

八卦事一則

最近在工餘時間,報讀了化妝及髮型的課程。讀報的原因,一來本身都鐘意扮靚,學左對自己都有幫助,二來又係離唔開「想學D手藝仔」、「想有D一技之長」果D原因。所以,學化妝髮型,正好可以滿足到我份人比較貪心的要求---「外觀上增值」及「內在知識增值」。

昨天上髮型課時,有段小插曲。突然有位媽媽來,原來她有位女兒想報名讀化妝髮型,那她就是上來幫女兒付學費。一上來,她頗為勞氣,說自己其實對課程什麼都不了解,她只是來俾錢,但到比錢時,又拖延了一段時間(其實感受到佢唔太想比,亦唔想個女學,不過個女話要學,咁佢就無奈地上來幫個女比學費)。

媽媽問了老師一些課程內容資料後,她其實都依然唔太想比錢,結果她竟然當眾開了SPEAKER,響大家面前打比個女,再CONFIRM個女: 其實你係咪真係要學? 兩母女的對話中,感受到佢地關係應該都不是好。個女既態度呼呼喝喝咁,不斷說: 係呀,我係學呀! 我那刻腦海感受到女兒的僭台詞: 比錢就比錢啦你,仲咁多GEE GUT...

收線後,媽媽將苦況不斷娓娓道來,說女兒現在18歲,讀書不成,之前響別處都學過化妝髮型,說個女到到學下,成日變,以前細個讀書時,已經成日轉學校。感覺上個女都係仲未定性。而家個女又要學第二間,她說自己離左婚,但只要個女真係想讀,點辛苦都會比錢佢讀。說完一輪,她還是帶點無奈地付上大概一萬四千元的課程學費。

聽完之後,我第一時間諗,如果我是那個媽媽,一定傷心死,咁辛苦生個女出黎養大佢,好似老奉咁既態度問自己拎錢,我肯定一個仙都唔比佢。18歲,都唔係細啦,有手有腳,腦筋正常,出黎打份全職工,無一萬都有八千,有心儲錢,自己供自己學化妝,一定沒問題。

再者,重點是,個徵結係一日個女這種學野三分鐘熱度的態度唔改,其實你比幾多錢佢學都冇意思,辛苦錢還是不斷白付,但個女學完又好似無學過,結果又再不斷找COURSE讀,自己可能因為要學習,又有個藉口唔洗打工,這只形成一個惡性循環。

我又在想,其實我這個想法又會唔會太苛刻。畢竟她都是單親家庭長大,這可能對她成長有點影響,造成性格上有點缺憾,始終家家有本難唸的經,唔知詳細的來龍去脈。有時侯,兩方也各有難處。關係這回事,有時不是一時三刻可解決,呢個時候,錢可能都是解決問題的方法---你想學化妝,學髮型,好,我比錢你去讀啦。

雖然內心很不願意......

2016年7月14日 星期四

分享

我其實都係一個好有主見的人,對好多不同的事,好多時心裡面好自然有自己的看法。有時覺得,成日得個諗字,自己不如乾脆開個BLOG記錄下來,同時也分享下。
我會在這分享一些關於護膚、化妝資訊或心得。另外也會分享自己踏入職場以來的工作點滴,有趣見聞呢!